Aal jaor in de meivekaansie gao ik met mien mamme en mien dochter op vekaansie. Nao een koppel stedentrips zulden wij in mei 2020 een hiele week hen Kreta veur een zunvekaansie. Nou, wij weet allemaol wal hoe dat oflopen is.
Dit jaor kunden wij eindelijk wal gaon. En wat hadden we een geluk: wij hadden boekt vanof Düsseldorf en niet vanof Schiphol! Daw in het vliegtuug nog een snoetschoetie veur mussen, dat hadden we der wal veur over um een week hen de zun te gaon.
De mieste dagen was het prachtig weer en dus biw met een mooi kleurtie op de snoet weerumkommen. Het water van het zwembad was nog wal wat kold, aj ’t mij vraogt, net as het zeewater. Toch hew in beide zwömmen. En umdaw niet zo goed bint in de hiele dag op het gat liggen, hew veural veul uutstappies maakt in de umgeving. As goeie ambassadeur van het Drèents, har ik vanzölf mien ‘Tied veur de zun’–karbies metnummen. Mooi waj dan op de mieste vrömde plekken opiens an Drèentse reacties kriegt!
Op vekaansie let ik as taolliefhebber altied op wat veur taolen der praot wordt. Op Kreta kuj je goed redden met Engels. Dat is goed te verklaoren, want het toerisme is ien van de veurnaamste inkomstenbronnen van het eiland. En aj goed met de toerist communiceren kunt, is der ok meer geld te verdienen. Zo simpel is ‘t. Toch leer ik ok altied een paar woordties van de taol van mien vekaansielaand. Aj ze dan anspreekt in heur eigen taol, wordt de glimlach net wat groter. Mien uutspraak was bliekbaor best aordig, want der weur ok wal ies in het Grieks weerumpraot. Dan hej niks meer an mij, want meer kennis van het Grieks as ‘yássas’, ‘kalimera’ en ‘efcharisto’ he’k niet. Maor da’k de muite nummen har um wat woordties te leren, weur donders op pries steld. Daor weur zu’n toch al gastvrije Griek nog net wat gastvrijer van.
En laow eerlijk weden, as iene muite döt um wat woordties Drèents te leren, dan wor wij daor toch ok allemaol bliede van? Al zul een vekaansieganger in Drenthe allén maor leren um ‘moi’ te zeggen, dan zul dat toch al hiel mooi weden?
Het Grieks mag dan wal hiel stoer lieken, maor dat komp veural umdat ze het aans schrieft. Aj binnenkört nog op vekaansie gaot hen Kreta, weet dan daj met ‘yássas’ (uut te spreken as ‘jaaaaa Sas) het Griekse ‘moi’ te pakken hebt en daj dat ok gebruken kunt aj weer vortgaot.
Veur de vekaansiegangers op Schonebek die dizze Jaknikker under ogen kriegt en van zins bint um Drenthe op de fietse te verkennen, hef schriever Ton Peters trouwens nog een tip:
Kruustocht
Een dag over het asfalt is gien punt
op ieuwenolde weggies moej niet wezen
je gaot al nao een paar minuten vrezen
dat starven zachies bij het kruus begunt
Lichtkaans daj nooit van naogeslacht geniet
aj over Drèentse kinderkoppies riedt
Nou moi hè!