Schier: Kedogies

Herken ie dat? Daj een kedogie van iene kriegt en op het moment daj het kriegt lek het asof een klein stukkie van de wereld um je hen even stilstiet en dat alle andacht hiel even op je richt is? Kriej wat waor aj al hiel lang op wacht hebt? Of is het een kedogie daj niet verwacht hadden? Dan vuult het misschien wal wat mysterieus an. En zölfs aj al weet wat er in het pakkie zit, blef het moment van uutpakken bezunder.

En ok veur de gever is het een speciaal moment, want die wil dat de aander zuch bezunder vuult. En dan giet het er niet um hoe groot het kedo is of of wat veur prieskaortie der an hangt, maor um de oprechtheid van de intentie derachter. Mangs zörgt een klein gebaar veur een grootste uutwarking. 

Zo waren zowal mien va as mien moe dizze maond jaorig. En elk jaor gaoj dan toch weer prakkezeren over een mooi kedo waor aj ze bliede met maken kunt. Maor wat geef ie iene die eigenlijk alles al wal hef? In het geval van mien va is dat nooit zo moeilijk: met een deusie sukelao en een flessie roekie-roekie (zoas e dat zölf altied zeg) is zien verjaordag  al rap slaagd. En met mien moe overleg we altied wat ze hebben wil, want niks zo vervelend as een kedo kriegen waorvan aj as ontvanger al zeker weet daj het nooit gebruken gaot. 

Wie ok gek is op kedogies, is schriefster Jessica Bonnema. Zie hef dizze maond heur eerste kinderboek uutbracht met de titel, ie kunt het vast al raoden, Kedogies.

Kedogies is een dichtbundel veur kinder. De gedichten in het boek beschrieft herkenbare situaties, van reizen met de trein en uut logeren gaon, tot veurkroepen bij de kassa. Deurdat elk gedicht er in het Drèents én het Nederlaands in stiet, kriej een mooi inkiekie in de meertaolige wereld. En het mooiste is dat achter in het boek een QR-code stiet die je naor geluudsopnames leidt van kinder die de gedichten veurleest. Zo kuj het dus ok geliek nog heuren!

Kedogies

Under de kerstboom
lig ik met mien hond.
Hij in zien maand,
ik op de grond.
Neusie an neus.
Pootie in haand.
Naost ons kedogies,
zölfs ien met ’n strik.
Maor de mooiste kedogies
binnen Woefie en ik.

Hoe dan?

Ik zie nooit dat ze naor binnen.
Deur de deur, ’t raom, een kier?
Ik zie nooit dat ze naor binnen.
Misschien samen met de mier?
Ik zie nooit dat ze naor binnen,
maor ik weet dat ik ze heb.
Kleine neefies, kriebelsprinnen,
vind ik samen in een web.

De dichtbundel Kedogies is een mooi kedo um vort te geven of te kriegen en is vanof nou te koop bij het Huus van de Taol en bij de betere boekhandel.