Toen ik, zowat veer jaor leden, solliciteerde naor de functie van directeur bij het Huus van de Taol was het stichtingsbestuur over ien ding hiel dudelijk: as organisatie wolden ze de blik nog meer hen buten richten. Op die menier zulden wij aandere doelgroepen (zoas dat zo mooi het) anspreken kunnen. Daor hew met mekaar dan ok hard an warkt de lèste jaoren. Maor hoe meet ie dan of dat ok daodwarkelijk lukt? Dat is een goeie vraog – maor het feit dat begun dizze maond bleek dat ik nomineerd was veur de ‘Vrouw in de Media Award’ veur Drenthe, is wat mij angiet een mooie bevestiging daw de goeie kaant opgaot.
Een hiele eer ok um nomineerd te weden, kan ik je vertellen. Mien concurrentie in Drenthe bestiet undermeer uut gedippeteerde Nelleke Vedelaar, directeur van stichting Het Drentse Landschap Sonja van der Meer en hoofdconservator bij het Drents Museum Annemiek Rens. De winnaor van dizze verkiezing giet deur naor de laandelijke verkiezing, waor alle previnciewinnaars metandoet. En dat bint niet de minsten, die daor nomineerd bint. Wat te dèenken van Caroline van der Plas, Annemiek van Vleuten, Christianne van der Wal, Marion Koopmans of Sharon Dijksma?
De achterliggende gedachte bij dizze verkiezing is dat vrouwelijke deskundigen nog aal undervertegenwoordigd bint in de media. In 2021 kwam het percentage vrouwlu dat as expert an het woord was niet wieder as 26,7%. En aj dan kiekt naor hoe kerels en vrouwlu in het neis neerzet wordt, dan ziej dat vrouwlu drie maol vaker as kerels identificeerd wordt an de haand van heur gezinssituatie. Bij kerels wordt er dus minder vaak zegd dat ze ‘zeun van’ of ‘echtgenoot van’ bint. Ik har dacht daw daor vandaag de dag wal een beetie of weden zulden.
Het is wal mooi dat het wark daw doet en waor aw de media veur opzuukt, bliekbaor opvalt! Maor daormet biw der nog lang niet. Zolang ze (veural laandelijk) in de media meer óver oes praot as mét oes, dan hew nog een hiele weg te gaon. Hoe kan het dat bij OP1 bij een gesprek over streektaol de deskundige Herman Pleij is? Met alle respect veur wat e daon hef, maor dizze emeritus (duur woord veur ‘met pensioen’) hoogleraar historische Nederlaandse letterkunde is gien expert op het gebied van streektaol. Hie kan schier praoten en döt het goed op tillevisie, dus zit e bliekbaor bij elke talkshow in de ‘rolodex’. Dat is slim zunde, want der bint een bult experts in oes warkveld die der wál wat zinnigs over zeggen kunt, vanuut heur eigen ervaring en underzuuk. Vraog Joana Duarte ies an taofel! Zie is lector Meertaoligheid en Geletterdheid bij NHL Stenden én bezunder hoogleraar Wereldburgerschap en Twietaolig Underwies an de Universiteit van Amsterdam. Of vraog Martijn Wieling (geboren op Klazienaveen) die bezunder hoogleraar Nedersaksische/Grönninger Taol en Cultuur is. En zo kan ik nog wal even deurgaon.
Over laandelijke media sproken: ik krieg nog wal ies commentaar a’k gien Drèents praot op laandelijke radio of tillevisie. Bezunder vind ik dat. Volgens mij huuf ik niet te bewiezen dat ik Drèents praot en is het goed overbrengen van de bosschup veul belangrieker! Aw wilt dat ze oes in de rest van het laand ok serieus nimt, dan moew ze eerst uutstukken waorum. As de waardering veur oeze taol der dan ienmaol is, dan kuw ok meer heuren laoten in oeze taol.
Op het moment van schrieven van dizze column is de stembus veur de ‘Vrouw in de Media Award’ nog lös, maor tegentied daj dit under ogen kriegt, is de uutslag wal bekend. En wat die ok is, ik bin al hiel wies met de nominatie.