Schier: Brummels!

‘Brummels!’ reup tante Alie hiel hard toen ze op het grote scharm de foto zag. ‘Bedankt Tante Alie’ reup de rest van de femilie, want ze zaten middenin de grote Streektaolstried op de femiliedag en niet elkenien wus het Drèentse woord veur ‘bramen’. 

Een paor week leden much ik veur het eerst ‘de wei’ weer in. Zo vuulde dat in elk geval veur mij. Veur het eerst weer op pad um ‘fysiek’ een lezing te geven met anslutend de Streektaolstried. En weej waor ik terechtkwam? An het Middendörp op Schonbek!

Bij de naam ‘Het Middendörp’ kuj dèenken dat het middenin het dörp lig, maor in dit geval koj dan bedrogen uut. De straot lig an de oostkaant van Schonbek en daankt zien naam an zien ligging:  midden tussen het Oosterse Bos en het Westerse Bos. 

Het was een schiere naozommerdag. Dat kwam goed uut, want wij zaten buten. Vanzölf ok wal lekker, want dan huufde de organisatie heur ok niet zo drok te maken over aerosolen en ventilatie. 

Mien komst was niet ankondigd, of ja, zie hadden wal ankondigd dat er nog ‘wat gebeuren gung’, maor niet wat of dat nou precies was. Elkenien gung dus blanco de lezing in. 

https://encrypted-tbn0.gstatic.com/images?q=tbn:ANd9GcSwvx4UDBsG9tYNWPWlL-D-6Hqz1eozangc9g&usqp=CAU

Waor een diel van de femilie nog altied in Drenthe woonde, waren der ok goenende die as een hiele toer leden al hen Noord-Holland verhuusd waren. Starker nog, heur kinder en kleinkinder waren gieniens in Drenthe geboren. Ok woonden der wat in het Gooi, in Overiessel en op de grèens van Drenthe en Grunning. Een mooi bont gezelschap dus, aj kiekt naor taolen en taolinvloeden Ik vertelde over de achtergronden van het Drèents en legde uut dat het Nederlaands nog niet bestund, toen aw hier in Drenthe al Drèents preuten met mekaar. Dat was vanzölf koren op de meulen van de geboren Drenten. En nao dizze inleiding was elkenien klaor um de Streektaolstried met mekaar an te gaon. Der weurden groepies maakt, groepsnamen bedacht en toen barstte der een fanatieke stried lös an het Middendörp. Der was discussie over  uutdrukkingen en woorden, der weur prebeerd um mekaar op het verkeerde bien te zetten en der weur mangs goed graven in het geheugen. 

Vanuut het Huus van de Taol biw met ienige regelmaot op pad um lezingen en kwissen te doen. De iene maol is dat op een femiliedag, de aandere maol bijveurbeeld op een personeelsfeest, een bijienkomst van de Vrouwen van Nu of een bijienkomst van undernimmers.  Zölf vind ik het ien van de mooiste dingen um te doen, umda’k dan letterlijk de taol ‘an de man’ brengen kan. En van de interactie met het publiek steek ik ok nog altied weer wat op. 

Aj dus een maol een leuke Drèentse drèei geven wilt an een gezellige middag of aovend kuj  oes altied even bellen!

En tante Alie uut Noord-Holland? Die hef het uuteindelijk niet wunnen. Het team van ‘de heer des huizes’ gung der met de winst vandeur: een verrassingspakket van het Huus van de Taol. En de hiele femilie kreeg een schier boekie met 101 Drèentse woorden um nog een maol nao te praoten in of over het Drèents.