Zo zachiesan komp der weer locht an het èende van de COVID-tunnel. Wij kunt weer uut eten, wij mugt weer hen de bioscoop en het theater én wij kunt weer op vekaansie. Want ja, de miesten van oes bint nou wal oetkeken op Playa Balconia, Rundumhausen en Costa del Zolder.
En aj dan dommiet lekker languut veur de caravan of bij je huusie ligt, wat is der dan lekkerder as lezen in een goed, dik en spannend boek? Toen ik in 2019 solliciteerde bij het Huus van de Taol, vertelde ik dat ik geern ‘thrillers’ lees. Bij het darde gesprek kreeg ik van ien van de bestuursleden De Paddenvanger in haanden drukt. ‘Dat is net wat veur je!’. En dat was ok zo. Een spannend verhaal dat zuch ofspeult op plekken waor aj zölf regelmaotig west bint, gef zu’n boek nog ies een extra laog! Schriever Anne Doornbos (opgruid op Erica) har trouwens in december 2018 de Streektaalprijs van het Dagblad van het Noorden al wunnen veur dizze Drentstalige speurdersroman. En ik heb mij der in de vekaansie ok goed met vernuverd. Al was e wal rap uut, want wegleggen was feitelijk gien optie!
En nou is der dus een nei boek van de haand van Doornbos verschenen. En ok dizze maol stiet inspecteur Rossing veur een groot mysterie. Zul de wereld der beter uutzien as der bij de politie meer inspecteurs warkten zoas Freek Rossing? Zo iene die met een flinke portie zölfrelativering en een nuchtere kiek op de wereld de misdaod anpakt?
Bij de eerste slag van de boormachine kek Herman Pieterman op. Hij lig op zien rugge op de holten baank op de haanddoek. Van zien gezicht loopt straolties zwiet. Bij het zien van de bivakmusse komp e in ‘t èende en probeert de deure lös te doen. De klamp döt zien wark en zet de deure stief vast. Herman Pieterman slat met zien vuusten op de deure. ‘He, wat mut dat! Verdomme!’
De schroef vret deur het holt en zet de deure wieder vaste.
De man die Russisch preut begunt op een vrogge winterse mörgen in Gies, zo op ’t oog toch een rustig dörp. Maor de kraantenbezörger ontdekt een braand in een blokhut. Een blokhut die een sauna bliekt te weden, waor op dat moment iene met een rooie kop an ’t zwieten is. Der is gien griepen an veur politie en braandweer….al dat holt braandt as een gek. Maor waorum kun de saunaganger der niet op tied uut kommen? Wat is der gebeurd? Al gauw komp het team van Freek Rossing tot de conclusie dat der toch maor ien meugelijkheid is: het is moord op een hoge metwarker van de NAM!
Het drama in Gies lat niet allén in Drenthe, maor ok in Den Haag de alarmbellen rinkeln. Veur Rossing en zien team begunt een stoere speurtocht. Hef het te maken met het verzet tegen de gaswinning in Grunning? Is der wat loos in het huwelijk van het slachtoffer? Of komp dit deur onienigheid over een mestopslag? In de loop van het underzuuk graaft Freek Rossing en zien collega’s aal dieper in het verleden. Een verleden waorin smerige geheimen rond collegialiteit, ontrouw en verraod speult.
Met dit boek levert Doornbos weer een thriller of die zuch ofspeult in Drenthe en waorbij ’t dus weinig muite kost um je een veurstelling te maken van de plaotsen waor inspecteur Rossing komp. Een moord in Gies? Je kunt je vast wal een veurstelling maken bij de impact die dat hef op de inwoners van het pittoreske dörpie met pak em beet 600 inwoners.
En met 369 bladzieden een ideaal (e-)boek um met te nimmen op vekaansie. Allewal ik betwiefel o’k zölf zo lang wachten kan met het lezen van De man die Russisch preut. Tegen de tied daj dizze column under ogen kriegt, he’k hum zölf vast al uut!