Schier: De neie vrijwilliger

Vanuut de aandere Nedersaksische taolgebieden wordt mangs stikjaloers naor het Huus van de Taolkeken. En dat begriep ik wal. Van alle streektaolorganisaties in het Nedersaksische taolgebied hew in Drenthe namelijk de grootste. Op kantoor hew al meer volk zitten as de aandern, maor het grote verschil zit hum in oeze vrijwilligersorganisatie.

Wij hebt in elke Drèentse gemiente een Streektaolambassadeur zitten, die samen met een koppel streektaolvrijwilligers zörgt veur de organisatie van activiteiten. Dan bint er ok nog aandere vrijwilligers die zuch veur oes inzet: daorbij kuj bijveurbeeld dèenken an oeze manuscriptenkemissie (die beoordielt of manuscripten goed genog bint um der een boek van te maken), an de meziekwarkgroep, de spellingkemissie, de redactieleden van Zinnig en Roet of an oes bestuur. En dan he’k ze gieniens allemaol nuumd. Maor al met al hew op dit moment umdebij 150 vrijwilligers die op de ien of aandere menier betrökken bint bij het Huus van de Taol.

Neie vrijwilligers derbij vinden is, net as veur aandere organisaties, wal een uutdaging . Dat zal in Schonebek vast ok zo wezen. 
Vrogger was het hiel gewoon um vrijwilligerswark te doen. Ie waren vrijwilliger bij ien of meer clubs, die aj trouw bleven tot in lengte van dagen. En vanzölf waren ie alle dagen (behalve zundag) beschikbaar. Zo warkt het vandaag de dag niet meer. 

De neie vrijwilliger:

  • wil niet allén wat geven, maor verwacht ok wat weerum : wat leren of sociale contacten bijveurbeeld.  
  • wil veurof weten hoeveul tied hie/zie kwiet is an een klus 
  • wil weten wat e doen möt: ien dudelijk ofgebakend project
  • holdt niet van vergadern, maor wil an de slag
  • bindt zuch niet veur het leven an dezölfde organisatie

Aj vrijwilligers zuukt moej dus aandere wegen bewandeln as vrogger. Dat is bij het Huus zo, maor ok veur aandere organisaties.  Wij huuft gien aandere dingen te doen, maor wij moet dingen wal aans doen. Wij vraogt ze dus veur een specifieke taak in een specifieke periode. Of wij geeft ze de ruumte  um zölf de tied in te dielen. Wij begriept dat heur tied kostbaar is en dat ze der zölf ok rieker van worden wilt; ze wilt wat neis leren, ze leert neie mèensen kennen, ze kunt de kop even leeg maken, ze kunt der even uut en bint under de mèensen of ze wilt gewoon schik hebben. Allemaol dingen die oeze vrijwilligers zölf ok zo ervaart, dus dan kuw het ok zo overbrengen op potentiële neie vrijwilligers!

Ja, en ie vuulden hum vast al ankommen…ok veur de gemiente Emmen biw nog op zuuk naor vrijwilligers. En dan giet het op dit moment um vrijwilligers die as in de meertmaond veurlezen wilt op de basisschoelen en um vrijwilligers die het leuk vindt um een Drèentstaolige pubquiz in de gemiente te organiseren. As je dat nou wat lek, bel mij dan even, dan vertel ik je der alles over!

Tot een aander maol! Tjeu!
Renate – 0628781928