Schier – Koken met Keen

Op 26 november komp der een bezunder boek uut bij oeze uutgeverij: Koken met Keen. Een humoristisch Drèentstaolig kookboek van de haand van Klazienavener Roelof Keen. Met prachtige illustraties van Schonbekker Gerrit Pomp. Op 27 november signeert ze ’s middags bij de Bruna op Klazienaveen! Mooi moment um ze hier alvast even het hemd van het lief te vraogen.

Roelof Keen 
Roelof, woj jezölf wal even veurstellen?
Ik bin Roelof Keen, 57 jaor en al roem 32 jaor trouwd met mien Anja. Ik woon met heur en oeze beide dwergteckelties in Klazienaveen. In het dagelijks leven bin ik warktuug-bouwkundige en warkzaom bij Hendriks Metaalbewarking in Emmen.

Hoe koj der bij um een kookboek te schrieven?
Boeten het schrieven in de Drèentse taol, heb ik ok barre veul schik an het maken van allerlei lekkere dinger in de keuken. Met aander woorden, ik mag ok geern koken. Kiek, aj die beide passies combineert, koj al gauw oet op het maken van een kook- / verhalenboek.

Hoe belangriek is koken veur je?
Koken is hiel belangriek veur mij. Mien breurs, zussen en ikzölf bint as kind deur mien moe altied slim verwend met lekker eten. Dat vun zij bliekbaar hiel belangriek. Die kookgenen heb ik van heur metkregen. 

Ie hebt een achtergrond as sporter. Bint alle gerechten uut je boek dan ok gezonde, verantwoorde gerechten?
Mien sportverleden is een hiel ver verleden, maor die tied hef ok een aandere kaant. Ik heb deur het veule sporten wal mien scholders naor de bliksem hölpen. Nee, sporten doe ik niet meer en daor is ok niks van te marken in mien neie boek. Ik bin een echte lekkerbek en de recepten bint eerder bourgondisch as supergezond te numen. 

De illustraties bint maakt deur Gerrit Pomp, hoe kent jullie mekaar?

We hebt samen hiel wat trainingsuurties achter oes liggen, met as hoogtepunt de paralympische speulen in Seoul (Korea) in 1988. Ik wus van eerder dat e gloepens mooi tieken kun, dan is het in mien ogen vanzölf-sprekend dat ik hum vraogd heb um de illustraties te maken. Ik bin hum dan ok gruwelijk dankbaor!

Gerrit Pomp
Gerrit, woj jezölf wal even veurstellen?
Ik bin Gerrit Pomp, 66 jaor. Ik heb jaoren in Amersfoort woond en in Soest warkt as tiekenleraar. Maor nou binnen wij alweer 8 jaor terug in Drenthe, waor onze roots liggen. Met mien vrouw, mien schoonmoe en onze labrador Penny woon ik achter het olde gemientehuus in Schonbek.

Vertel ies wat over je baand met Roelof.
Ik ken hum van de Gehandicapten Sportclub Emmen. Atletiek was onze mandielige passie. Van Amerika tot Japan hebben wij as ‘wheelers’ metdaon an wedstrieden. En aj veul samen internationaol vliegen en in hotels verblieven, dan ontstiet er een een hechte baand. 

Hoe belangriek is de Drèentse taol veur je? Wilma is geboren op Schonbek en ik kom van Eerappeldordt. Under mekaar hebben wij dus altied Drèents praot. 

Was het stoer um illustraties te maken bij Roelof zien kookboek?
Veur mij was het een hiele eer! Wal pittig, umdaw vunden dat elke illustratie wat toevoegen mus an het verhaol. En het manuscript veraanderde nog wal ies, waordeur de tiekening ok metveraandern mus.

Bi’j zölf ok van het koken?
Ik eet het liever op, waorbij gezellig samen weden hiel belangriek is. Roelof umschref dat in het recept ‘Kip à la Keen’ perfect.Hej ok gerechten uut Roelof zien boek pruufd?
Roelof is veural van het eerlijke vleis. Ok daorin kunnen wij mekaar goed vinden. De ‘gruwelijk lekkere gehaktballen’ en ‘Mientjes stoofperen’ binnen goddelijk!