‘Ben ik nou zo slim of ben jij zo dom?’ Ik dèenk dat de miesten van oes dizze legendarische uutspraak van de al net zo legendarische coach Louis van Gaal zuch nog wal heugen kunt. Zo zachiesan bin ik bang daw dommiet allemaol as dom de boeken in gaot. Ik zie namelijk aal meer neis over kunstmatige intelligentie en zogenuumde chatbots op internet die overal antwoord op weet te geven. Ja, en dan niet allent op simpele vraogen as ‘waor lig Schonebek?’, maor het schient daj ze veur alles gebruken kunt: van het bedèenken van verjaordagskedogies, het voeren van filosofische gesprekken tot het schrieven van een artikel of een essay.
Zul de chatbot in de toekomst dan ok mien column schrieven kunnen? A’k een koppel Drèentstaolige steekwoorden geef? Veur het behold van oeze prachtige taol zul het lichtkaans niet iens zo gek weden, aw dit der ok bij kriegen kunt. Maor um nou alles an chatbots en robots over te laoten? Dat lek mij verrekte saai! Gelukkig huuf ik daor nog niet wakker van te liggen: chatbots kunt (nog) gien Drèents.
Aj heurt wat die chatbots zo allemaol doen kunt, zuj vergeleken daormet haost zeggen da’k iene hen heideplukken heb. Of da’k niet deurbakken bin. Je zult mij haost een euliekoek numen, een gaorenklopper of een siepeltrien.
Maor dat zal ok vast metvallen. Ik heb sowieso al wat veur op de chatbot: die prat gien Drèents. Vanzölf bint er veul taolen die e wál prat, maor meertaolig biw allebei. En dat is ok net het mooie: aj naost het Nederlaands nog een aandere taol derbij leerd hebt van jongsof an, dan hej al mooi op tied je ‘analytische denkvermogen’ an het wark zet. En ja, daor wordt iene een stuk leper van. Dan bi’j de duvel misschien nog wal te leep of! Of ze nuumt je een ‘klouken kerel’. En aj dan ok nog ’t bekkie niet op de beddeplaank liggen laoten hebt, dan praot ie aandern ok nog met gemak under taofel. Dat kuw instandholden deur met mekaar in gesprek te blieven. As het even kan, der ok veur te zörgen daw dat geregeld in het Drèents doet. Dan hol we dat streepie veur op de chatbot.
Aj dan zölf zo voeg, glad, slauw, leep of loos bint, zul het dan niet mooi weden um je kennis van de Drèentse taol ies te testen? Niet in een stried tegen de chatbot, maor in een spel? Ok dit jaor maak we in samenwarking met RTV Drenthe weer de kennisquiz ‘LOOS’. En aj van spellegies holdt en dèenkt daj veul over Drenthe en de Drèentse taol weet, dan kuj je gratis anmelden um metan te doen! Dat kuj dan doen op rtvdrenthe.nl/loos en wie wet ziew mekaar dan in meert bij de opnames.
Over meert spreuken: dat is vanzölf oeze Meertmaond – Streektaolmaond. Dé maond waorin we het Drèents nog net even wat meer in de schienwarpers zet. Oes tiedschrift Wiesneus giet dommiet weer in een oplage van 25.000 stuks de previncie in en oeze vrijwilligers mugt eindelijk de klassen weer in um uut het blad veur te lezen. Op verscheiden plekken in de previncie bint er in meert Streektaolstrieden (ok daor kuj je kennis testen!) en in de loop van de maond komp de neiste thriller van schriever Anne Doornbos uut: Grafgift. Maor daorover meer in de volgende editie van de Jaknikker.
Woj nou weten wat er nog meer te beleven is op het gebied van de Drèentse taol? Kiek dan even op oeze website, daor stiet een agenda op met een bult activiteiten. En hej zölf een activiteit waor het Drèents een rol in speult? Geef het dan even deur op info@huusvandetaol.nl, dan zörg wij derveur dat je activiteit ok in oeze agenda stiet.