Zo an het end van het jaor kiekt de mieste mèensen nog even weerum naor het ofgelopen jaor en dat hew bij het Huus van de Taol ok daon. En aw dan ziet wat veur lillijke dingen der allemaol gebeurt en gebeurd bint in de wereld – dèenk maor ies an de oorlogen in Oekraïene en Israël, de overstromingen in Marokko of de gebeurtenissen in Rotterdam bij het Erasmus Medisch Centrum – dan lek het oes veural belangriek um het jaor of te sluten met positieve en lieve dingen.
Aal jaor in december hol wij de verkiezing van het Mooiste Drentse Woord. Maor veur dit jaor gaow dat dus een beetie aans doen. Het lek oes een beter idee um dit jaor het Liefste Drentse Woord van het Jaor kiezen te laoten.
Lief is een woord daw gebruukt um oeze dierbaren te beschrieven, of het nou giet um oeze partners, kinder, kameraoden of zölfs huusdieren. Het is een woord dat de basis vörmt veur de liefde die de wereld an de gang holdt.
Het woord lief zölf is meer dan allent een beschrieving; het is een warm gevuul daj argens bij kriegt. In een tied waorin de wereld mangs verdield lek te weden deur mieningsverschillen en conflicten, kunt lieve woorden een krachtig tegengif weden. Het brengt oes dichter bij mekaar, het verstarkt oeze relaties en het mak de wereld een zachtere, mooie stee.
Dus laow die lieve woorden koestern en wat meer met mekaar dielen, juust umdaw as Drenten oeze zachte kaant misschien niet zo vaak zien laot.
En wat bint dan precies lieve woorden? Ja, dat zal veur elkenien aans weden. Daorum he’k veur mijzölf al even een liest maakt, misschien daj der wat inspiratie uuthalen kunt. En misschien ok wal hielemaol niet. Wie wet. Ik zal mien liest niet insturen, want vanzölf bin ik as jury uutsloten van dielname.
Zoaj misschien wal weet schref zangeres Martijje ok columns in oes tiedschrieft Zinnig en in ien van de columns har ze het over haansies. Ok al zo’n lief Drèents woord, aj ’t mij vraogt.
Dat haansies andoen hogere wiskunde was in het baby-gebeuren, was ik evenpies vergeten sinds de veurige twee kinder. Aj van die lange, elastische, anslutende boorden an de haansies hebt zitten, dan bint ze te krap um over het jassie hen te doen, maor je hebt vaok het jassie al andaon veurdaj dacht hebt an die rötdingen. Het jassie weer uutdoen kan ok niet, want dan is der alom verwarring en reerderij bij de baby. Under de boord deur foemeln kan wel, maor makkelk is aans. Dat kleine armpie is as spaghetti. Dan moej je eigen fiene motoriek wel goed deurontwikkeld hebben.
Met dizze column loop ik wal een beetie veur de meziek an, want de officiële communicatie hierover doew altied met RTV Drenthe en dat gebeurt vanof 1 december. Dus ie kunt wal stellen daj met mekaar een primeur hebt op Schonebeek! En daj dus wat extra tied hebt um ies te prakkezeren over lieve Drèentse woorden. Vanof 1 december kuj die dan via huusvandetaol.nl insturen.
Zo maak we met mekaar de wereld weer een beetie mooier!