Nog even en het is alweer meert. Het is de maond waorin de lente officieel begunt. Ok wordt de klok verzet. Die giet veuruut, waordeur we weer terugkomt in de zommertied. De dagen wordt langer, der komp meer locht. Nao de wisselvallige winter die aw had hebt, lek het mij heerlijk! Maor ja, meert reurt zien steert, dus het kan ok nog best weden daw nog scheuveln kunt in meert. Allewal me dat vrij stark lek.
Wussen ie trouwens wal dat meert (maart) vernuumd is naor Mars, de Romeinse god van de oorlog? Want ja, met de terugkeer van de mooie dagen kunden ze ok weer op pad um oorlog te voeren. Laow hopen dat dizze kennis vandaag de dag niet meer in de praktijk bracht wordt, wij hebt al genog oorlog in de wereld.
Even weer terug naor de meertmaond, dat is vanzölf ok de streektaolmaond. Dé maond in het jaor waorin wij het Drèents nog net even wat meer naor veuren schoeft as in de aandere maonden van het jaor. En dat doew deur een bult dingen te organiseren. Zo maak wij elk jaor het tiedschrift Wiesneus veur de basisschoelkinder, die in een oplage van 25.000 stuks de previncie in giet. En waorbij oeze vrijwilligers de schoelen in gaot um veur te lezen.
Op verscheiden plekken in de previncie bint er streektaolstrieden. Zeg maor Drèentstaolige pubkwissen, waorbij het der miest hiel fanatiek um weg giet. Dizze maol bint die in Beilen, Zeijen ,Ieghaor en op ‘t Hollandscheveld
Der bint ok een koppel Drèentse gemienten die de raodsvergadering van meert in de streektaol doet en soms kriegt ze dan ok nog bezuuk van oeze streektaolambassadeur en streektaolvrijwilligers die ze wat bijbrengt over de taol.
En dan is der ok nog het illustere actiecomité Drents op Stee, waorvan gienien wet wie derin zit. Maor dat ze het hart op de juuste stee hebt veur de streektaol dat is wal dudelijk. Ze wilt dat er meer Drèents in de openbare ruumte zichtbaar is. En um in de anonimiteit te kunnen blieven, gaot ze dan ’s nachts op pad um bijveurbeeld plaotsnaomborden twietaolig te maken. Ik bin beneid wat ze dit jaor weer doen gaot.
In meert kuj ok nog twie maol naor Taal an Taofel, in Dwingel en in Noord-Slien, waoraj genieten kunt van een programma met optredens van schrievers, zangers en muzikaanten.
En vanzölf is LOOS vanof dunderdag 7 meert weer aal warkdaogen op tillevisie.
Dan is er der ok nog een warkconferentie Nedersaksisch op 22 meert in Wolvega en die hef dizze maol as thema ‘underwies’.
Ok bint er allerlei aandere initiatieven in de previncie waorbij de streektaol centraal stiet. Kiek veural ok even op oeze website um te zien welke activiteiten der bint.
En doew dan de rest van het jaor hielemaol niks meer met het Drèents? Ja natuurlijk wal! Die aandere maonden bint ok belangriek, maor op meert zet we gewoon even de schienwarper um de taol nog net even wat meer veur het voetlicht te kriegen.
Misschien zie ik je nog wal argens in de meertmaond-streektaolmaond!