Deur alle coronaregels hew mekaar twei jaor niet smokken muggen. Veur de ien was dat lichtkaans een hiele opluchting, veur de aander een teleurstelling en een gebrek aan fysiek contact. Nou het weer mag, ziej wal dat niet elkenien der evenveul behoefte an hef. Maor ik heb goed neis veur wie die dat wal hef: op 6 juli is het Wereld Kus Dag! Ja, dat hej goed lezen, daor is gewoon een internationale dag veur. Waor niet veur eigenlijk vandaag de dag? Anti-Dieet Dag, Dag van je Ex, Dag van de Maximumsnelheid, Houd-het-Schoon-dag, Orgasmedag (en dat nog wal op mien eigen verjaordag!) of Boerenkooldag. Ie kunt het ja zo gek niet bedèenken of der is wal een dag veur.
Even weerum naor Wereld Kus Dag. Waor die precies ontstaon is, is mij niet hielemaol dudelijk worden. De iene website zeg in het Engeland van de 19e eeuw en dat klinkt mij hiel romantisch in de oren. Een aandere website hef het over 2006. Daor zit nogal wat tied tussen! Feit is wal dat smokken goed veur je is; het zörgt veur minder stress, je verbraandt calorieën en het is goed veur je immuniteit. Wat woj nou nog meer? Geef ies wat vaker een smok, een pakkerd, een drukkerd, een smakkerd, een tuut of een caramelzoeger! Of zoas ze op Nei-Schonebeek zegt: een muulken. Dus griep je kaans op 6 juli en smok der op lös (as de aander dat teminnen ok goed vindt)!
Schriefster Marga Kool hef der een hiele novelle over schreven: ‘De mooiste kus’. En aj het eerste stukkie lezen hebt, dan wi’j vast ok weten hoe het precies zit met die kus. Dat wol ik wal in elk geval.
De mooiste kus
Dat het niet allent de langste, de hartstochtelijkste, mar ok wied- uut de mooiste kus ewest hef die het dorp ooit te zien ekregen har, daor is iederiene het wel over iens. De vrouwe van de neie börgemeister har derbij op heur underlip ebeten. Wedevrouw Bartjes har op het gevuul in heur tassie um-evuuld naor de zakdoek. En de olde juffrouw Schötteldoek, van oorsprong underwie- zeres op de gemienteschoele, har heurzölf veurover ebeugen naor slager Gortemaker, die een rij veur heur zat. Angedaon mar trots har ze hum in de dikke nak efluusterd: ‘Hij hef nog bij mij in de klas ezeten. Zien va ok, dat hef e.’
En eerlijk is eerlijk: töt op het moment dat Regina opstun midden in de zaal, en mit verstikte stemme naor veuren reup: ‘Opholden! Direct opholden!’ har gieniene der kwaod in eziene. Der waren zölfs manlu die zachies hadden zitten grinniken, umdat ze over het algemien bij dit soort stukken de momenten van humor en de momenten van tragiek mar slecht uut mekaar kunden holden. En wat Alina Meisters betreft: net as wanneer ze samen mit heur Albert op de baank veur de tillevisie seksfilms zat te kieken, kun ze het ok dit keer niet naolaoten even naor zien broek te kieken. En ok dit keer har ze daor, ondanks het gedempte locht, hiel licht wat zien bewegen, duchte heur.
Mar de kus zölf, en de vraog of zo’n kus ooit op dizze manier egeven had maggen worden, het bint zaken die oenze dörpsgemienschop vanof het leste weekend van januari töt op de dag van vandage, dik drei maond later, nog töt op het bot verdield holdt. Zo hef een diel van oenze inwoners, vaak betreft het openbaren, het daorbij dan altied over de Liefde en de Cultuur en zuks wat hen. Mar aandem hebt het over lege instincten en ontrouw. Sommigen, miestal Cocksen, hebt het over de Veurzienigheid en het al dan niet veur mekaar bestemd wezen. Een enkeling verwes zölfs naor de duvel! Partie lu hebt het over het noodlot, en het tarten daorvan. Over uutlokking hebt ze het, en over deugen of niet deugen. En al mit al is oens dorp, mit een tenielgeschiedenis die, volgens de olde meister Mariens, weerum giet töt an de zeer late Middelieuwen, nou zwaor gehandicapt. Het dorp mit töt veur kort de oldste tenielvereniging van oenze previncie, is nou het ienigste Drentse dorp zunder tenielvereniging! Dat bint dingen daor mar stoer mit klaor te komen is en die hoe dan ok niet valt goed te praoten.