Ik weet niet hoe het je vergiet, maor elk jaor a’k de keuken induuk um veur de kerst steufpeerties te maken, kan ik weer op zuuk naor een nei recept. Waor die aandern allemaol bleven bint? Al slaoj mij dood (doe maor niet, dat is zeker zo kört veur de kerst gien mooie gedachte).
Maor sinds veurig jaor huuft dat gezuuk niet meer; Klazienavener Roelof Keen bleek mien redder in nood met zien prachtige kookboek! Hie hef der een heerlijk recept veur. En hie gef ok nog ies interessante anwiezingen bij het koken.
Mientie heur steufperen
Wat bi’j neudig:
- een dikke kilo steufperen (denk der um, Gieser Wildeman)
- 1,5 glas rooie wien (± 250 ml.) Ik kook bar geern met wien, en mangs gooi ik het zölfs in het gerecht
- een half glas rooie port (doe maor 150 ml.)
- 100 gram poeiersuker
- 1 zakkie vanillesuker
- 1 kruudnagel
- 1 kanielstokkie
- eventueel wat bindmiddel, beveurbield eerpelmeel. Het huuft niet, da’s puur persoonlijk
Wat moej doen:
- Begun maor met het minste wark: schel de peren. Je kunt ze hiel laoten, maor kunt der ok vörtelties van maken. In het leste geval wal even het klokhoes deroet lepeln.
- Tied um te controleren of de wien wal lekker is (slokkie zo oet de fles mag).
- Doe de peren in een beste pan, samen met de wien. Vul de pan an met water tot de peren net niet under staot.
- Pruuf de port en as e goedkeurd is, doe die dan ok in de pan.
- Voeg het kanielstokkie en de kruudnagel toe.
- Doe de poeier- en vanillesuker derbij, dan bi’j veurlopig klaor.
- Laot het hiele spul twei uur koken. Hej mooi tied veur een glassie wien.
- Let der op dat in de tied dat de peren op staot zie under het vocht blieft.
- Maak aj wilt het perennat wat dikker met bindmiddel as de peren lekker zacht en gaar bint. Maor ik doe dat eigenlijk nooit meer. Het is zo al bar lekker.
- Laot de peren ofkoelen en dien ze op.
Roelof: Honderd percent zeker weten daj anbeden wordt deur de eters. Het is dus de muite weerd.
In Roelof zien boek staot ok zat recepten veur een goed heufdgerecht. Ik kies derveur um hier een naogerecht te plaotsen waormet aj zeker weten 100 punten scoort bij de schoonfemilie. En dat is ok wat weerd, niet waor?
Panna cotta ‘Rianne’
Wat bi’j neudig:
- 125 gram ‘cantuccini alla mandorla’ (amandelkoekies met amarettosmaak, elke supermarkt hef die wal te koop) of een aander koekie dat krummeln wil
- 3 bladties gelatine
- ¾ vanillestokkie
- 40 gram suker
- 30 gram botter
- 80 ml. limoncello (wat meer mag ok; tiedens het koken moej wal wat te drinken hebben)
- eventueel wat lekker zute slagroom
- een blender
- 4 van die snakkerige cocktailglazen (aander glaswark is ok goed)
Wat moej doen:
- Doe ongeveer 100 gram koekies in de blender en maal ze dan zo fien as ’t maor kan.
- Smelt de botter in een steelpannegie en doe de koekkrummels derbij.
- Maak der een mooi pruttie van, doe het op de bodems van de glazen en druk het lekker stief an.
- Wiek undertied de gelatine in een roeme bak met kold water.
- Snie het vanillestokkie in de lengte deur en schraop het marg der oet.
- Breng de slagroom, suker en vanille in een pannegie rustig an de kook.
- Kniep de gelatine oet en doe die samen met de limoncello bij de slagroom in ’t pannegie. Even deurreuren tot alles mooi oplöst is.
- Laot het mengsel ofkoelen tot kamertemperatuur.
- Doe het slagroomspul op de koekbodems in de glazen.
- Laot alles mooi opstieven, dat duurt wal evenpies (2,5 tot 3 uur).
- Verkrummel vlak veur het oetserveren de rest van de koekies en verdiel die over de glazen.
- Tip: Een lekkere dikke lepel slagroom der bovenop, maakt het hielemaol compleet.
Roelof: Hol der rekening met dat elkenien die het pruuft, alle zundagen tegen etenstied wéér veur je deur stiet. In dat geval, kuj beter dit recept een stuk of wat keer oetprinten en an ze metgeven. Kuj ok gewoon een keer vort um chinees te halen.
Ik snap wal dat Roelof de Streektaolpries van het Dagblad van het Noorden kregen hef veur dit kookboek: de jury roemde hum umdat e de streektaol op een mooie menier toegankelijk mak veur elkenien met zien boek. En zo is het maor net! En die prachtige tiekeningen van Schonbekker Gerrit Pomp maakt het hielemaol of.
Ik wèens elkenien heerlijke feestdagen en een mooi begun van 2023. Tot volgend jaor!