Bosschuppen, braandstof, energie … alles is de leste tied gigantisch duurder worden. En ik mark dat de ‘inkoper’ in mij dan nog meer anwezig is as aans. Die ‘inkoper’ dateert uut de tied da’k vekaansies inkocht en contracten meuk met campings, bungalowparken en hotels. En altied de priezen an het vergelieken was um te zörgen dat ‘oeze’ boekers de beste priezen hadden as ze op vekaansie gungen. En aj dan de hiele dag priezen zaten te vergelieken op je wark, ja…dan deden ie dat op een gegeven moment in huus ok. En dat doe ik nog aal en nou dus weer wat meer. Blokkies veur de afwasmesene? Nooit kopen in de supermarkt! Altied even kieken bij de grote drogisterijketens. Hetzölfde geldt veur shampoo, douchespul en zukswat.
Geregeld weur der veurig jaor een pakkie bij oes bezörgd, waorbij aj an de butenkaant niet zien kunden wat erin zat. Maor op een gegeven moment har mien vriendin het wal deur: ‘Hej weer zitten bieden op ‘Sla je slag’? Kunden ie het weer niet laoten?’. En zo hew nou mooie, goedkope tuunspotties. Een druppelslang um oeze plaanties nat te holden bij hiet weer (dat het ding nog in de verpakking zit, umdaw nog aal plaanties halen moet, daor hew ’t dan even niet over). En ok een goedkope koptillefoon van een goed mark, die het nog aal döt! Da’k de onkruudbraander nog maor ien maol gebruukt heb, komp niet umdaw gien onkruud hebt, maor umdat het toch een beetie een onding bleek te weden. En de mooie Mexicaanse wèeierpalm veur in de tuun was veural hiel populair bij oeze katten en hef het spietig genog niet overleefd. Dus die waren toch eigenlijk niet zo veurdelig.
Oeze keesrasp is sinds kört ok weer underuut de kast kommen, want ik kreeg ja zowat een rolberoerte toen ik een maol een puutie geraspte kees uut de supermarkt metnimmen wol! En a’k bij de boer zuvel haal in een glazen fles, dan moe’k binnenkört ok maor ies zörgen veur een olderwetse schraoper, vind ie ok niet?
Ik bin in de luxepositie da’k nog aal op vekaansie gaon kan, maor veurda’k een boeking maak, vergeliek ik alles wal honderd maol! Welk hotel hef de beste priezen op welke website? Welke vliegmaatschappij hef veur oes het beste anbod? En belangrieker nog: vanof welk vliegveld? Zo bin ik der net weer van een vekaansie Kreta met mien moe en mien dochter. En dizze maol biw vanof Dortmund vleugen um de simpele reden dat de vliegtickets daor teminnen de helft goedkoper waren as die vanof Schiphol of Düsseldorf. En ok het parkeren was der een stuk goedkoper!
Op Kreta was het leven trouwens ok een stuk goedkoper as hier. Veur nog gien 10 euro kregen wij daor een heerlijk heufdgerecht op een groot bord! Maor het feit dat bij elke parkeerplaots nog een mannegie of vrouwgie zit um het geld te innen en dat er bij zowat alle wegwarkzaamheden nog gewoon iene met een rooie vlag stiet te zwèeien reup bij mij ok wal wat vraogen op. Want waor wordt dat dan allemaol van betaold?
Laot ik het bij mijzölf holden: ik bin niet broodarm, zit niet nauw in de klompen en loop der ok niet behölpen bij. Bij oes in huus is het gien loezerige boudel en wij heurt ok niet bij het gilde van de bekkesnieders, zoas ze dat in Diever zegt aj gien cent te makken hebt. (In Rune bint de bekkesnieders trouwens messentrekkers en dat is dan weer hiel wat aans).
Mak mien inkopersgedrag dan dat ik een kniepstuver of een griepstuver bin? Of nuum ie mij liever een gierpèens, kniepkeutel, kniezebieter of zunige miegerd? Dat is dan maor zo! Uuteindelijk moew allemaol haspeln naor daw gaoren hebt. En dan is der niks mis met um, zeker in tieden van inflatie, een maol extra goed te kieken naor wat dingen kost en oj ze echt neudig bint.